فرزند مولانا حبیب الرحمن خان شروانی

            ماہ گزشتہ میں ہماری مجلس کے دو محترم ارکان بلکہ اساطین کو ’’وداعِ عزیز‘‘ کے دو جانگزا صدمے برداشت کرنے پڑے، مولانا حبیب الرحمن خان شروانی کو اپنے ’’محبوب‘‘ فرزند کی مفارقت دائمی کا داغ اٹھانا پڑا اور حسام الملک نواب سید علی حسن خان کو اپنے برادر بزگوار نظام الملک نواب سید نورالحسن خان کی دائمی جدائی کا غم سہنا پڑا، یہ دونوں بزرگوار ہماری مجلس کے دست و بازو ہیں، ان کا صدمات سے دو چار ہونا ہمارے لئے لازمۂ غم اور داعیۂ ماتم ہے،

لایحزن اﷲ ’’الحبیب‘‘ فانّنی

لآخذ من حالاتہ بنصیب

            مرنے والوں کے لئے دعائے مغفرت انسان کے غم کا علاج نہیں، لیکن اس کی روحانی تشفی کا باعث ہے، اللھم الحقھما بالرفیق الاعلے۔ (سید سليمان ندوی’، نومبر ۱۹۱۷ء)