پروفیسر ہیکل

            ماہ اگست میں علمی دنیا کا سب سے بڑا حادثہ پروفیسر ہیکل کی وفات ہوا، پروفیسر موصوف ڈارون و ہکسلی کا ہمعصر، اور بہ لحاظ شہرت و وقعت ان کا ہمسر تھا۔ وفات کے وقت اس کی عمر ۸۵ سال سے متجاوز تھی، ہیکل کا وطن جرمنی تھا، لیکن اس کی عظمت تمام دنیا میں مسلّم تھی اور سائنس کی دنیا میں کوئی شخص اگر اس وقت استاذ الاساتذہ کی حیثیت رکھتا تھا، تو ہیکل تھا، اس کا اصلی مضمون بیالوجی (علم الحیات) تھا، جس میں، اسے متعدد اکتشافات و مجتہدانہ نظریات کا شرف حاصل ہے، لیکن اس کے علاوہ فلسفہ وغیرہ میں بھی اس کی تصانیف موجود ہیں۔ اس کی مشہور کتاب اردو میں بھی ’’معمائے کائنات‘‘ کے عنوان سے زیر ترجمہ ہے۔ (سید سليمان ندوی، اکتوبر ۱۹۱۹ء)