ڈاکٹر مرسیر

            ڈاکٹرمرسیر اس وقت انگلستان میں امراض عصبی و دماغی کے نہایت ممتاز ماہر تھے، جنون و متعلقات جنون پر ان کی متعدد تصانیف تھیں، نفسیات پر بھی وہ بعض اہم تصانیف کے مصنف تھے ان کا ایک خاص کارنامہ یہ ہے کہ ۱۹۱۲؁ء میں انھوں نے ’’نیولاجک‘‘ (جدید منطق) کے نام سے ایک ضخیم کتاب لکھی، جس میں ارسطو، مل، ہیگل وغیرہ کے متعارف نظامات منطق پر اعتراضات کی بھرمار کرکے انھوں نے اپنا ایک جدید نظام منطق پیش کیا، اس پر علمی حلقوں میں ایک غلغلہ برپا ہوگیا اور اب تک علمی رسائل میں برابر بحث و مناظرہ کا سلسلہ جاری رہا، ڈاکٹر موصوف نے دفعتہ ستمبر گزشتہ میں وفات پائی، ان کی وفات سے انگلستان کی بزم علمی کا ایک رکن رکین اٹھ گیا۔

(نومبر ۱۹۱۹ء)