مسٹر تلک

            ہندوستان کے لئے ماہ گذشتہ کا اہم ترین حادثہ مسٹر تلک کا انتقال تھا، اپنی سیاسی حیثیت سے قطع نظر کرکے مسٹر تلک ملک کی علمی زندگی کے بھی ایک بہت بڑے عنصر تھے، وہ سنسکرت زبان کے ماہر اور ہندوؤں کے علوم قدیمہ کے ایک زبردست عالم تھے، قدامت وید کے متعلق انہوں نے جو فاضلانہ مقالہ پہلی اورینٹل کانفرنس کے سامنے ۱۹۲۰؁ء میں پیش کیا تھا، اسے مستشرقین کے حلقہ میں خاص وقعت کے ساتھ دیکھا گیا۔ اس کے بعد سے مسٹر تلک نے ویدوگیتا کے متعلق بلندپایہ تصانیف و مضامین سنسکرت اور انگریزی میں شائع کئے، اور ماہرین فن ان کی وسعت نظر و تبحر علمی کا ہمیشہ اعتراف کرتے رہے، ہندوستان اپنی بزم علمی کے اس رکن رکین کے اٹھ جانے پر جس قدر بھی تاسف کرے بجا ہے۔ (ستمبر ۱۹۲۰ء)