سر چارلس لایل

            ماہ گزشتہ میں انگلستان کے ایک مشہور متشرق سر چارلس لایل کی وفات ہوئی موصوف مدت تک ہندوستان میں ممتاز ملکی مناصب پر مامور رہے تھے، ۱۸۹۸؁ء میں چیف کمشنر صوبہ متوسط کے مرتبہ سے پنشن پائی اور اس کے بعد بارہ برس تک انڈیا آفس میں کام کرتے رہے، مسلمانوں کے علوم و السنہ، خصوصاً فارسی، عربی اور اردو کے وہ ایک مستند عالم خیال کئے جاتے تھے اور شعراء عرب کے متعدد دواوین ان کے تحشیہ و مقدمہ کے ساتھ شائع ہوئے، وہ برٹش اکاڈیمی کے فیلو تھے اور ایڈنبرا، آکسفورڈ، اسٹراسبرگ، مختلف یونیورسٹیوں سے ال۔ال۔ڈی، پی۔ایچ۔ ڈی، ڈی۔لٹ وغیرہ کی اعزازی ڈگریاں رکھتے تھے، انسائیکلوپیڈیا برٹانیکا کے آخری ایڈیشن میں ہندوستانی (اردو) لٹریچر پر مضمون انہی کے قلم سے تھا، ان کی عمر ۷۵ سال کی تھی۔ (اکتوبر ۱۹۲۰ء)