پاپائے رومہ ، بنڈکٹ پانز دہم

            آغاز سال رواں میں پاپائے رومہ، بنڈکٹ پانز دہم نے انتقال فرمایا، ان سطروں کے شائع ہونے تک ان کے جانشین کا بھی انتخاب ہوچکا ہوگا، جس وقت سے پاپائیت کا باضابطہ عہدہ قائم ہوا ہے، صدہا افراد اس منصب پر مامور رہ چکے ہیں، بلکہ اگر ابتدائی عیسوی صدیوں کے بشپ صاحبوں کو بھی اس فہرست میں شامل سمجھا جائے تو شاید شمار سیکڑوں سے متجاور ہوجائے، سوال صرف اس قدر ہے کہ اس طویل و عظیم فہرست میں کسی غیر یورپی شخص کا بھی نام تلاش کرنے سے مل سکتا ہے؟ مسیحیت کے حدود تو ماشاء اﷲ ایشیاء، افریقہ کے گوشہ گوشہ تک وسیع ہوچکے ہیں اور ان ممالک میں کروڑوں باشندہ ’’ابن اﷲ‘‘ کے کلمہ گو موجود ہیں، پھر کیا اب تک ان بے شمار نفوس میں ایک شخص بھی یورپی مسیحیوں کی ہم سطح وہم پلہ نہیں پیدا ہوسکا ہے؟

(سید سليمان ندوی، فروری ۱۹۲۲ء)