لارڈ کارنیوورن

            فرانسیسی ماہرین مصریات کا خیال ہے کہ لکسر میں جو مقبرہ برآمد ہوا ہے وہ نوتن خیمن کا نہیں ہے، بلکہ اس کے دوسرے جانشین ہارن ہیب کا ہے، حال ہی میں پروفیسر اڈورڈ نوبلے نے پیرس کی مجلس علمی کے سامنے اس موضوع پر ایک عالمانہ لکچر دیا اور اس میں اپنے اس دعویٰ کو ثابت کیاہے، اور بتایا ہے کہ ۱۹۰۸؁ء میں ایک امریکن نے ہارن ہیب کے مقبرہ کے نام سے جو جگہ دریافت کی تھی، دراصل وہی نوتن خیمن کا مقبرہ ہے۔

            اسی سلسلہ میں یہ معلوم کرنا سخت افسوس ناک ہے کہ اس اکتشاف کے روح رواں لارڈ کارنیوورن کا مصر ہی میں بخار سے انتقال ہوگیا، اس پر تمام حلقوں میں عجیب چہ میگوئیاں ہورہی ہیں، چنانچہ بہت سے روحانیت کے قائل لوگوں کا خیال ہے کہ فرعون کی لاش کی کوئی ہمزاد حفاظت کرتا تھا یا اس پر کچھ نقوش اس قسم کے تھے جن کا اثر لارڈ موصوف پر مہلک ثابت ہوا۔ (مئی ۱۹۲۳ء)