سرآسوتوش مکرجی
گذشتہ ماہ کا سب سے بڑا علمی اور تعلیمی حادثہ سر آسوتوش مکر جی کی وفات ہے، بنگال کا یہ سپوت فرزند گو ایک نامور بیرسٹر، ایک قابل جج ہائیکورٹ، ایک بڑا مصنف، ایک مشہور ریاضی دان تھا، تاہم اس کی ناموری، قابلیت، بڑائی اور شہرت کا سب سے بڑا مظہر یہ تھا کہ اس نے تقریباً بیس برس تک ہندوستان کی سب سے بڑی درسگاہ کلکتہ یونیورسٹی پر بہ حیثیت وائس چانسلر سب سے عمدہ اور بہتر حکمرانی کی ان کی اس تعلیمی فرمان روائی کا زمانہ بنگال کی تعلیمی ترقی، اور امتحانات کی وسعت اور یونیورسٹی کے انتظامات کی خوبی اور معاملات تعلیمی میں حکومت کے مقابلہ میں پوری قوت کے ساتھ اپنے حقوق کی حفاظت کے لحاظ سے ہندوستان کا تعلیمی عہد زریں کہا جاسکتا ہے، موصوف نے اپنے بست سالہ عہد فرمان روائی میں یہ ثابت کردیاکہ جہاں تک یونیورسٹی کا تعلق ہے بنگال حکومت کی بے جا قید سے آزاد اور خود مختار ہے، ۲۹؍ مئی ۱۹۲۴؁ء ان کی وفات کا دن بنگال کے دائرہ تعلیم کے لیے ایک سانحہ عظیم ہے۔ (’’س‘‘، جون ۱۹۲۴ء)