جسٹس سیّد امیرعلی مرحوم
سیدامیرعلی مرحوم تمام تر جدید تعلیم کی پیدوار تھے، مگر انہوں نے بزرگوں کے سُنے سُنائے معلومات اور ذاتی کدو کاوش سے یورپ میں اسلام کی بڑی خدمت کی، وہ یورپ میں تمام اسلامی کاموں اور تحریکوں کے رکن رکین سمجھے جاتے تھے ان کے مذہبی اور سیاسی خیالات سے گوہم موافقت نہ کرسکیں، مگر اس میں کوئی شبہ نہیں کہ ان کے قلم کی ضوافشانی سے اسلام کے متعلق یورپ کے بہت سے خیالات باطلہ کے بادل پھٹ گئے، ان کی دوکتابیں اسپرٹ آف اسلام اور ہسٹری آف ساراسینس ہمیشہ یادگار رہیں گی، ان دونوں کتابوں کے ترجمے اکثر اسلامی زبانوں میں موجود ہیں، حتیٰ کہ عربی میں بھی ہوچکے ہیں، ۷۹ سال کی عمر میں اس جہان فانی کو الوداع کہا، مرحوم سے ۱۹۲۰؁ء میں کئی دفعہ لندن میں ملنے کا موقعہ ملا تھا، رحمۃ اﷲ تعالیٰ۔ (سید سلیمان ندوی، اگست ۱۹۲۸ء)