نواب عبدالسلام خان رامپوری
نواب عبدالسلام خان مرحوم رامپوری سب جج ان لوگوں میں تھے جن کو کتابوں کا عاشق زار کہنا چاہئے، وہ عمر بھر نوادر کتب کے جمع کرنے میں مصروف رہے اور وہ ان کو اس قدر عزیز رکھتے تھے کہ ان کے لیے ہر قسم کی تکلیف گوارا کرلینا راحت جانتے تھے، مونڈہ پانڈے ضلع مراد آباد ریلوے اسٹیشن کے قریب ان کا گاؤں تھا، وہاں یہ ان کا کتب خانہ تھا، ابھی ایک ہی دو برس ہوئے کہ ان کا انتقال ہوا، ان کے صاحبزادوں نے اب اپنے کتب خانہ کی (۱۱۴۸) کتابیں مسلم یونیورسٹی کی لٹن لائبریری کو پانچ برس کے واسطے مستعار دے دی ہیں، کتابیں لائبریری میں پہنچ چکی ہیں اور ان کی فہرست تیار ہورہی ہے، امید ہے کہ ہماری مسلم یونیورسٹی ان جواہر پاروں کی قدر کرے گی اور اس مدت میں ان سے کچھ فائدہ اٹھائے گی۔ (سید سلیمان ندوی، فروری ۱۹۳۱ء)