سرفخرالدین
۱۹؍ جون ۱۹۳۳؁ء کی صبح کو مشرقی ہند کے مرکزی شہر پٹنہ کے جسم سے روح نے مفارفت کی، سرفخرالدین وزیر تعلیمات جو وہاں کے سب سے زیادہ ہر دلعزیز مسلمان تھے، ۶۵ برس کی عمر میں وفات پائی، ان چند مہینوں کے اندر اس شہر کے وہ پرانے نئے تعلیمیافتہ اصحاب جو وہاں کی مجلس کی شمعِ بزم افروز تھے، ایک ایک کرکے رخصت ہوگئے، سر علی امام کی وفات پر سیاسی تدبر و قابلیت کا ماتم ہوا، حسن امام کے مرنے پر قانون دانی کا نوحہ پڑھاگیا، لیکن سرفخرالدین کی رحلت پر انسانیت اور اس کی شرافت کا ماتم ہے۔
مرحوم نیک دل، متواضع، فیاض، مشرقیت پسند اور دیندار تھے، اسی لئے انکی وفات پر پورے صوبہ نے ماتم کیا، شہر کے سب سے بڑے میدان میں پورے شہر نے نماز جنازہ پڑھی اور صوبہ کے سب سے مقدس مقام پھلواری شریف میں اپنے مرشدین کے مقبرہ میں جگہ پائی، اﷲ تعالیٰ مرحوم کی روح پر اپنی مغفرت کے پھول برسائے۔
(سید سلیمان ندوی،جولائی ۱۹۳۳ء)