مولوی محبوب عالم
اس ماہ کے شذرات کا صفحہ وفات نامہ ہوا چاہتا ہے، مگر احسان فراموشی ہوگی اگر ملک کے سب سے بوڑھے صحیفۂ نگار مولوی محبوب عالم اڈیٹر پیسہ اخبار لاہور کا ماتم نہ کیا جائے، ۲۸؍ مئی کو انہوں نے اس دارِ فانی کو الوداع کہا، وہ اردو کے سب سے پہلے روزنامہ اخبار (پیسہ) کے اڈیٹر تھے، انہوں نے صرف اپنی محنت و کوشش سے سرمایہ حاصل کیا اور ملک میں تاریخ اور سیاحت ناموں کے پڑھنے کا ذوق پیدا کیا اور خود بھی یورپ اور ممالک اسلامیہ کے دوسفر کئے اور سیاحت نامے لکھے، مگر افسوس کہ اب ان کو وہ سفر پیش آیا جس کا سفرنامہ انسانوں کے ہاتھ نہیں، فرشتوں کے ہاتھ لکھتے ہیں، اس ان دیکھی منزل کے بوڑھے مسافر پر اﷲ تعالیٰ کی رحمت ہو۔
مرحوم نے ۷۴ برس کی عمر پائی۔ (سید سلیمان ندوی، جولائی ۱۹۳۳ء)
تصحیح: منشی محبوب عالم مرحوم کے تذکرہ میں یہ لکھا گیا ہے کہ وہ اردو کے پہلے روزانہ اخبار کے بانی اور اڈیٹر تھے، اس سے مراد مسلمانوں میں تھی، یعنی اردو کے پہلے اسلامی روزانہ اخبار کے وہ بانی اور اڈیٹر تھے، اردو میں منشی نولکشور لکھنو کا اودھ اخبار ان کے اخبار سے پہلے نکلا تھا اور اب تک نکل رہا ہے۔ (سید سلیمان ندوی، اگست ۱۹۳۳ء)