حافظ احمد علی خان شوق
یہ خبر افسوس کے ساتھ سنی جائیگی کہ رامپور کے مشہور علم دوست فاضل اور وہاں کے مشہور شاہی کتب خانہ کے سابق ناظم اور متعدد کتابوں کے مترجم و مصنف حافظ احمد علی خان صاحب شوقؔ نے اوائل رمضان المبارک ۱۳۵۲؁ھ میں تقریباً پینسٹھ اور ستر کی عمر کے درمیان میں انتقال فرمایا، مرحوم نہایت بااخلاق، بامروت، علم دوست اور صاحب کمال تھے، قلمی اور نادر کتابوں کے خاص ماہر تھے، معارف کے ناظرین کبھی کبھی ان کی تحقیقات سے مستفید ہوا کرتے تھے، ان کی سب سے بہتر کتاب تذکرہ کاملین رام پور ہے، اﷲ تعالیٰ غریق رحمت کرے۔ (سید سلیمان ندوی،جنوری ۱۹۴۳ء)