مولوی سید ممتاز علی
اخبارات کی زبانی ناظرین تک یہ خبر پہنچی ہوگی کہ ہماری زبان کے پرانے ادیب و مصنف اور مسلمان لڑکیوں کی تعلیم و تربیت کے مشہور مبلغ مولوی سید ممتاز علی صاحب مہتمم تہذیب نسواں لاہور نے وفات پائی۔ انَّاﷲ، مرحوم کا وطن، دیوبند تھا، عربی کی تعلیم پائی تھی، اور ساتھ ہی جدید تعلیم سے بھی بہرور تھے، اس زمانہ میں سرسید مرحوم کی تحریک کا شباب تھا، اس شمع کے گرد جو پروانے جمع ہوگئے تھے، ان میں ایک یہ بھی تھے، مسلمانوں میں وہ پہلے شخص تھے جس نے تعلیم نسواں کی تبلیغ کی، اور اس تبلیغ میں ان کو کامیابی حاصل ہوئی تھی، وفات کے وقت ان کا سن ستر (۷۰) کے قریب ہوگا ابھی اسی سال کے اخیر جنوری میں لاہور میں ملاقات ہوئی تھی، اسی وقت وہ زار و نزار، اور حبس بول کی شکایت میں مبتلا تھے، آخر وہ اس تکلیف سے جانبر نہ ہوسکے اور چل بسے، اﷲ تعالیٰ ان پر رحمت فرمائے، نہایت خوش خلق متواضع اور مرنج و مرنجان بزرگ تھے۔
(سید سلیمان ندوی،اگست ۱۹۳۵ء)