1676046599977_54337877
Open/Free Access
100
سید رشید رضا مِصری
افسوس ہے کہ ۲۲؍ اگست ۱۹۳۵ء (جمادی الاولیٰ ۱۳۵۴ھ) کو مصر بلکہ دنیائے اسلام کے سب سے بڑے عالم علامہ سید رشید صاحب المنار نے داعی اجل کو لبیک کہا، یہ مفتی عبدہ مرحوم کے سب سے ممتاز شاگرد اور سید جمال الدین افغانی کے فیوض و برکات سے بیک واسطہ مستفید تھے، شام وطن تھا، لیکن سلطان عبدالمجید خان کی داروگیر سے گھبرا کر چلے آئے تھے اور آخر یہیں کے ہوکر رہ گئے، عمر اس وقت ستر۷۰ سے کم نہ ہوگی، پھر بھی ان کی جسمانی قوت اور کام کی طاقت بہت اچھی تھی، اسلام کے اصلاحی مسائل ان کی تصانیف کا خاص موضوع تھا، المنار جس کی اشاعت دنیائے اسلام کے گوشہ گوشہ میں تھی، ان کی اڈیٹری میں نکلتا تھا، بلکہ یہ کہنا چاہئے کہ پورا رسالہ انہیں کے قلم کا مرہون ہوتا تھا، ان کی سب سے اہم تصنیف تفسیرالمنار تھی، جو افسوس کہ ان کی وفات سے ناتمام رہ گئی، یہ تفسیر زمانۂ حال کی ضرورتوں کو سامنے رکھ کر لکھ رہے تھے۔ وہ عقیدہ میں سلف کے پیرو اور فقہ میں غیر مقلد تھے، ان کی انشاء پردازی قدیم و جدید دونوں خوبیوں کولئے ہوئی تھی، فقہ، تفسیر اور حدیث میں یدِطولیٰ رکھتے تھے، ان کی آخری تصنیف ’’الرمی المحمدی‘‘ ہے، جس کا ہندوستانی ترجمہ کلکتہ سے شائع ہوچکا ہے، قدیم و جدید خیالات کی تطبیق ان کی ہر تحریر میں ہوتی تھی اور وہ اسی کے اس زمانہ میں اسلام کے لئے مفید خدمت سمجھتے تھے۔
اس زمانے میں جب ایسے روشن خیال و روشن ضمیر علماء جو ایک طرف متقی و پرہیزگار اور دوسری طرف زمانۂ حال کی ضرورتوں سے باخبر ہوں، انگلیوں پر گنے جاسکتے ہیں، سید رشید رضا کا ہمارے درمیان سے اٹھ جانا آج اسلام کا سب سے بڑا حادثہ ہے، وہ دنیائے اسلام کے کاشانہ میں ہدایت کے چراغ تھے، افسوس کہ یہ چراغ اب ہمیشہ کے لئے بجھ گیا، اور اس سے زیادہ افسوس یہ کہ اس چراغ کے گل ہونے سے المنار کی وہ روشنی بھی بجھ جائے گی جس کی کرنیں ہر ماہ تمام دنیا میں پھیلتی تھیں، ولعل اللّٰہ یحدث بعد ذلک امراً۔
میری ان کی پہلی ملاقات ہندوستان میں ۱۹۱۲ء میں ہوئی، جب وہ اس سال مولانا شبلی مرحوم کی تحریک سے ندوۃ العلماء کے اجلاس لکھنؤ میں صدر ہوکر آئے، پھر ۱۹۲۴ء میں مصر جاکر ان سے ملا اور مجلس خلافت مصر اور شیوخ ازہر سے میری ملاقات کا ذریعہ بنے، آخر میں ۱۹۲۶ء کی موتمر اسلامی میں مکۂ معظمہ میں ملاقاتیں ہوتی رہیں، مکاتبات کا سلسلہ بھی تھا۔ (سید سلیمان ندوی، اکتوبر ۱۹۳۵ء)
ID | Chapters/Headings | Author(s) | Pages | Info |
ID | Chapters/Headings | Author(s) | Pages | Info |