حافظ ہدایت حسین ؍ علامہ راشد الخیری ؍ مولانا شیر علی
میری علالت کے زمانہ میں ملک و ملت کی کئی نامور ہستیوں نے اس دنیائے فانی کو الوداع کہا حافظ ہدایت حسین صاحب مرحوم اس صوبہ کے مسلمانوں کی بڑی دولت تھے، اس دولت کا چھن جانا ہماری سب سے بڑی محرومی ہے، دلی کے پایہ تخت کی بھی ایک یادگار مٹ گئی، یہ مولانا راشد الخیری کی ذات تھی، جس نے اپنی ساری عمر مسلمان عورتوں کی علمی و ادبی و تعلیمی خدمت گزاری میں بسر کردی، دکن کے خزانہ کا بھی ایک قیمتی ہیرا گم ہوگیا، یعنی مولانا شیر علی صاحب سابق مدرس اعلیٰ دارالعلوم ندوہ و سابق استاد کلام جامعہ عثمانیہ نے وفات پائی، مرنے والے مرگئے، مگر ان کے کارنامے دنیا میں یادگار رہ گئے۔
از صدائے سخن عشق ندیدم خوشت

یادگارے کہ دریں گنبد دوار بماند
)(سید سلیمان ندوی، اپریل ۱۹۳۶ء)