مولوی نورالحسن صاحب نیّر
افسوس کہ اس مہینہ مولوی نورالحسن صاحب نیر، بی، اے۔ ایل،ایل، بی خلف حضرت محسن کاکوروی نے ایک مدت کی علالت کے بعد وفات پائی، وہ انگریزی کے ساتھ عربی کے بھی عالم تھے، ندوہ العلماء کے ممتاز رکن اور دارالعلوم کے سابق معتمد تھے، وہ سخنور، سخن سنج، سخن شناس، سخن دان سب کچھ تھے، ان کی زندگی کا سب سے اہم کارنامہ اردو لغت نوراللغات کی تالیف ہے، خدا ہمارے اس ادیب شاعر کو اپنی رحمت کے انعام و اکرام سے سرفراز فرمائے۔ (سید سلیمان ندوی، اکتوبر ۱۹۳۶ء)