منشی پریم چند
افسوس ہے کہ اس جلسہ میں ہندی اور ہندوستانی کا وہ ادیب موجود نہ تھا، جس کا قلم ان دونوں دریاؤں کا سنگم تھا، یعنی منشی پریم چند، ماسوف علیہ نے اسی مہینہ اپنے دوستوں کو آخری الوداع کہا اور اس دنیا سے رخصت ہوگئے، ان کے قلم نے کم از کم پچیس برس تک اپنے دیہاتی بھائیوں کی کہانی اپنے شہری بھائیوں کو سنائی، وہ زبان کے پرجوش فصیح و بلیغ نہ تھے، ان کی عبارت تکلف و بناوٹ سے پاک اور حددرجہ سادی تھی، ان کی کہانیوں کا اثر ان کی زبان میں نہ تھا، بلکہ ان کے بیان میں تھا، انہوں نے ہمارے دیہاتی تمدن، ہندوستانی وضع و آداب اور ہندی اخلاقی آن بان کی جو تصویر کھینچی ہیں وہ ہمارے ادبی مرقع کی زندہ جاوید یادگاریں ہیں۔
(سید سلیمان ندوی،نومبر ۱۹۳۶ء)