پروفیسر باور
پچھلے مارچ میں جرمنی کے ہالے یونیورسٹی کے علوم مشرقیہ کے پروفیسر باور کا انتقال ہوگیا، وہ لسانیات کے ماہر تھے، وہ یورپ کی تقریباً جملہ زبانوں کے جاننے کے علاوہ ساری سامی زبانوں سے واقف تھے اور تورانی زبانوں خصوصاً چینی زبان میں خاص مہارت رکھتے تھے۔ اس حیرت انگیز وسیع لسانیاتی واقفیت کے سبب سے وہ راس شمرہ کی کھدائیوں میں بعض نئے خطوں کے کتبوں کے برآمد ہونے پر ان کو حل کرسکے، ماسوف علیہ کو امام غزالی کی احیاء العلوم سے خاص دلچسپی تھی، اس کے متفرق ابواب کے ترجمے اکثر شائع کرایا کرتے تھے، اسلامی علم مرایا و مناظر پر بھی بعض اچھے مضمون لکھے تھے، انسائیکلوپیڈیا آف اسلام کے شریک ناشر بھی تھے اور فلک، حاء، حفص الفرد، وغیرہ عنوانوں پر اس میں مقالے لکھے تھے، ’’حرف تہجی کی ابتداء‘‘ پر ان کی ایک جرمن تالیف اس وقت مطبع میں ہے۔ (سید سلیمان ندوی، جولائی ۱۹۳۷ء)