پیر احسان اﷲ شاہ
علمی حلقوں میں یہ خبر غم و افسوس کے ساتھ سنی جائے گی کہ چھندم گوٹ ضلع حیدرآباد سندھ کے مشہور عالم پیر احسان اﷲ شاہ صاحب جو قلمی کتابوں کے بڑے عاشق تھے چوالیس برس کی عمر میں ۱۳؍ اکتوبر ۱۹۳۸؁ء کو اس دنیا سے چل بسے، مرحوم حدیث و رجال کے بڑے عالم تھے، اور ان کے کتب خانہ میں حدیث و تفسیر و رجال کی نایاب قلمی کتابوں کا بڑا ذخیرہ تھا، ان کے شوق کا یہ عالم تھا کہ مشرق و مغرب مصر و شام و عرب و قسطنطنیہ کے کتب خانوں میں ان کے کاتب اور ناسخ نئی قلمی کتابوں کی نقل پر مامور رہتے تھے، مرحوم ایک خانقاہ کے سجادہ نشین اور طریق سلف کے متبع، اور علم و عمل دونوں میں ممتاز تھے، اﷲ تعالیٰ مرحوم پر اپنے انوار رحمت کی بارش فرمائے۔ (سید سلیمان ندوی، نومبر ۱۹۳۸ء)