سیٹھ ابراہیم مہتمم مدرسہ عمر آباد
عمرآباد مدراس میں حاجی عمر (روشن کمپنی) کا خاندان ایک خاص حیثیت رکھتا ہے۔ حاجی صاحب امرتسر کے علمائے غزنویہ کے فیض سے مستفیض اور توحید و سنت کے متبع تھے، کامیاب تاجر تھے، اپنے ہی نام سے شمالی آرکاٹ میں ایک زمین خرید کر عمرآباد نام کا ایک مقام آباد کیا تھا اور وہاں ایک بڑے عربی مدرسہ دارالسلام کی بنیاد رکھی تھی، چندسال ہوئے کہ انہوں نے وفات پائی اور تیں صالح اولادیں اپنی یادگار چھوڑیں، اسماعیل، ابراہیم اور اسحاق، سب سے بڑے اسماعیل تو کاروبار کے نگراں ہیں اور ابراہیم نے جو منجھلے تھے مدرسہ کی دیکھ بھال، اس کے قیام و ترقی کو اپنی زندگی کا مقصد قرار دیا تھا، ابھی پچھلے سال جوہری طنطاوی کی تفسیر کا اردو ترجمہ ایک ہزار روپے کے صرف سے مطبع معارف میں چھپوایا تھا، مدرسہ کے لئے کتب خانہ تنہا اپنی ذات سے کتابیں خرید کر فراہم کیا تھا، اس کے لئے ایک عمارت بھی بنوائی تھی، افسوس کہ یہ پھول کھلنے سے پہلے ہی مرجھا گیا، یعنی ۳۰؍ رجب ۱۳۵۷؁ھ کو اس دنیائے ناپائیدار کو الوداع کہا، رحمہ اﷲ تعالیٰ۔ (سید سلیمان ندوی، نومبر ۱۹۳۸ء)