جان ون سنک کا انتقال
لیڈن کے مشہور مستشرق ڈاکٹر ایرنٹ جان ون سنک کا گزشتہ ستمبر میں انتقال ہوگیا، یوروپین مستشرقین میں ڈاکٹر موصوف کے علم و فضل کا پایہ نہایت بلند تھا، وہ ۱۸۸۲؁ء میں پیدا ہوئے، ۱۹۱۲؁ء میں لیڈن یونیورسٹی میں عربی کے لکچرر مقرر ہوئے، اور پھر ۱۹۲۷؁ء میں اس کے شعبہ عربی کی صدارت تفویض ہوئی، وہ انسائیکلوپیڈیا آف اسلام کے چیف اڈیٹر بھی تھے۔
ان کو شروع میں سامی زبان سے بڑی دلچسپی تھی، چنانچہ انھوں نے سامی علاماتی تخیل پر بہت سے مضامین لکھے، اس کے بعد وہ سریانی زبان کی طرف مائل ہوئے اور اس زبان کے صوفیانہ لٹریچر کا گہرا مطالعہ کیا اور برہیرس کی Book of Dove اور Mystical Treatises of Isaac of Ninerer کا ترجمہ کیا، پھر سریانی زبان کے صوفیانہ لٹریچر کے نئی معلومات کے نام سے ایک کتاب بھی لکھی۔
مگر وہ اسلامیات کے ایک مستند عالم کی حیثیت سے زیادہ مشہور تھے، فن حدیث پر انھوں نے مندرجہ ذیل کتابیں لکھیں:
(1) Mohammeden de joden te Medina.
(2) Handbook of early Muhamaden tradition.
(3) Concordonce et Indices de la tradition Masulmane.
(4) The Muslim Creed.
انسائیکلوپیڈیا آف اسلام میں مختلف موضوع پر ان کے مضامین بکثرت ہیں۔
(صباح الدین عبدالرحمن، مارچ ۱۹۴۰ء)