نواب اخترؔ یارجنگ
حیدرآباد میں اودھ کے ایک مشہور ممتاز مینائی خاندان کے فرد فرید نے بھی ہماری دنیائے فانی کو الوداع کہا، منشی امیر احمد صاحب امیر مینائی کے خلف الرشید نواب اختر یار جنگ بہادر جنہوں نے دکن میں امیر مرحوم کی وفات کے بعد سے دکن کو شاہ دکن کی نوازشوں سے اپنا وطن بنالیا تھا اور معتمد امور مذہبی کی حیثیت سے سینکڑوں مفید خدمات انجام دیں اور ہر نیک کام کی امداد میں سبقت کی اور اب چند سال سے پنشن پاکر عزت کی زندگی بسر کررہے تھے، اب وہ ہمیشہ کے لیے بزم حیات سے رخصت ہوگئے، اﷲ تعالیٰ ان کی نیک خدمات کا نیک صلہ عنایت فرمائے، وہ شاعر بھی تھے اور اختر تخلص کرتے تھے۔ (سید سلیمان ندوی،جولائی ۱۹۴۰ء)