مفتی محمد انوار الحق
بھوپال سے مفتی محمد انوار الحق صاحب ایم اے سابق وزیر تعلیم و حال وزیر مالیات بھوپال کی وفات کی افسوس ناک خبر آئی ہے، موصوف صاحب علم اور محب دین تھے، ان کی قلمی خدمات اور تحریری مجاہدات بھی خاص ذکر کے قابل ہیں، تاریخ ابوالبشر، اثبات واجب الوجود اور دوسری مذہبی کتابیں جدیدتعلیم یافتہ طبقہ کے لیے بہت مفید ثابت ہوئیں، عمر بھی علمی و تعلیمی کاموں کی مشغولیت کے باوجود اخیر عمر میں سرکار بھوپال کے مالیات کے صیغہ کو جس خوبی سے سنبھالا، دوست و دشمن ہر ایک نے اس کی تحسین کی، اﷲ تعالیٰ اپنے خزانہ رحمت سے اس علم و عمل کے مجسمہ کو سرفراز فرمائے۔
(سید سلیمان ندوی، جولائی ۱۹۴۰ء)