محمد پاشا محمودؔ
مصر کی ڈاک سے یہ معلوم کر کے بڑا افسوس ہوا کہ محمد پاشا محمود جو زغلول پاشا کے وفد کے ممبر تھے، اور بعد کوالگ ہو کر مصر کی وزارت میں شامل ہوگئے تھے، وفات پاگئے، ان کو ہندوستان سے یہ نسبت تھی کہ محمد علی مرحوم کے ساتھ اوکسفورڈ میں انھوں نے بھی تعلیم پائی تھی، پیرس میں وفد خلافت اور وفد مصر کی ملاقاتوں کے سلسلہ میں ان دونوں رفیقوں میں بڑی دلچسپ گفتگو ہوئی تھی، اور خاکسار سے زغلول پاشا کی ثالثی میں صحیح بخاری کی صحت پر ایک پر لطف مناظرہ ہوا تھا، زغلول پاشا کا یہ فقرہ جو محمد پاشا محمود کو مخاطب کرکے انھوں نے کہا تھا اب تک کانوں میں گونج رہا ہے، ودع الامام یتکلم۔ اﷲ تعالیٰ نام کی طرح اُن کی عاقبت بھی محمود فرمائے۔ (سید سلیمان ندوی، فروری ۱۹۴۱ء)