سر اکبر حیدری
افسوس ہے کہ ۸؍ جنوری ۱۹۴۲؁ء کی شام کو سابق صدر اعظم ریاست حیدرآباد سراکبر حیدری نے دلّی میں وفات پائی، سراکبر حیدری ہندوستان کی سب سے بڑی اسلامی ریاست کے وزیر مالیات اورپھر صدر اعظم ہونے کے سبب سے تمام اسلامی اداروں سے ایک خاص مربّیانہ تعلق رکھتے تھے، اور اس بنا پر ان کا حادثہ وفات ہم سب کے لیے غم و الم کا باعث ہواہے، ان کی عمر اس وقت ۷۲ برس کی تھی، مگر اس عالم میں بھی جس انہماک، مصروفیت اور بیدار مغزی سے وہ اپنے مفوضہ خدمات کو انجام دیتے تھے اس سے ان کے غیر معمولی دل و دماغ کے آدمی ہونے کا ثبوت ملتا تھا، اﷲ تعالیٰ ان کی مغفرت فرمائے۔ (سید سلیمان ندوی، جنوری ۱۹۴۲ء)