نواب محمد یارجنگ بہادر
نواب محمد یار جنگ بہادر (حیدرآباد، دکن) کی وفات کا سانحہ بھی اسی اثناء میں پیش آیا مرحوم نسلاً عرب تھے اور ایک مرنج و مرنجان بزرگ، نہایت مخلص، بے ریاباخدا، اور نیک طبع تھے، صوبہ داری کے منصب سے وظیفہ یاب ہوکر بلدہ میں مقیم تھے، حیدرآباد کی ہر علمی و تعلیمی تحریک میں وہ شریک رہتے تھے، دائرۃ المعارف اور مدرسہ نظامیہ کی اعزازی خدمت بھی ان کے سپرد تھی، دارالمصنفین سے مرحوم کو بے حد دلچسپی تھی اور ہمیشہ وہ اس کی مدد فرماتے رہتے تھے، اہل علم کے لئے ان کا گھر ایک مہمان خانہ کی حیثیت رکھتا تھا، اﷲ تعالیٰ مرحوم کو اپنی رحمتوں سے نوازے۔
(سید سلیمان ندوی، ستمبر ۱۹۴۲ء)