جناب سیماب ؔاکبر آبادی
افسوس ہے کہ ہندوستان کے نامور شاعر جناب سیماب اکبر آبادی نے جو کچھ دنوں سے فالج میں مبتلا تھے، ۳۱؍ جنوری کو کراچی میں انتقال کیا، وہ داغ کی یادگار صاحبِ طرز اور موجودہ دور کے اساتذہ میں تھے۔
ان کے شاگردوں کا دائرہ بہت وسیع اور ان کا ایک خاص حلقہ تھا، انہوں نے اپنے رسالہ شاعر آگرہ کے ذریعہ اردو ادب و شاعری کی بڑی خدمت انجام دی، اور ہندوستان کے ان حصوں میں بھی جہاں شاعری کا چرچا کم تھا اس کا مذاق پیدا کردیا، اس لیے ان کی موت تنہا ایک شاعر کی نہیں، بلکہ ایک محسنِ ادب اور خدمت گذار اردو کی موت ہے، اﷲ تعالیٰ انکو اپنی رحمت و مغفرت کی داد و تحسین سے نوازے۔
(شاہ معین الدین ندوی، فروری ۱۹۵۱ء)