جناب صفیؔ
افسوس ہے کہ ہماری پرانی بزمِ شعروسخن کی یادگاریں ایک ایک کر کے اٹھتی جاتی ہیں ابھی چند مہینے ہوئے جناب صفی ہم سے جدا ہوئے تھے کہ گذشتہ مہینہ جناب آرزو نے الوداع کہا، یہ دونوں اپنے فن کے باکمال اساتذہ اور اردوزبان کے بڑے خدمت گذار تھے، صفی نے لکھنو کے قدیم رنگِ تغزل کی اصلاح کے ساتھ قومی و ملی نظموں کا مذاق پیدا کیا جو لکھنو کے شعراء میں بہت کم بلکہ نہ ہونے کے برابر تھا، ان کی بعض پرانی نظمیں اتنی مقبول ہوئیں کہ ان کے اشعار اب تک لوگوں کی زبانوں پر ہیں۔
(شاہ معین الدین ندوی،مئی ۱۹۵۱ء)