مولانا حیدر زمان صدیقی
اسی مہینہ میں پاکستان کے ایک خط سے یہ افسوس ناک اطلاع ملی کہ جنوری کے آخری عشرہ میں مولانا حیدر زمان صدیقی نے وفات پائی، مرحوم سے صرف علمی مراسلت رہتی تھی، اس لئے ان کے ذاتی حالات کم معلوم ہیں، ایک زمانہ میں اُن کا قیام پٹھان کوٹ میں تھا، مگر ہندوستان کی تقسیم کے بعد سے ہری پور ضلع ہزارہ میں منتقل ہوگئے تھے، مرحوم بڑی صلاحیتوں کے مالک تھے، اور اپنی علمی وتصنیفی زندگی کے ابتدائی ہی دور میں ایک خاص حلقہ میں اچھی خاصی شہرت حاصل کرلی تھی، اسلامی تعلیمات کی روشنی میں جدید دور کے سیاسی و معاشی مشکلات کا حل اُن کا خاص موضوع تھا، اس موضوع پر وہ معارف اور دوسرے رسالوں میں برابر مضامین لکھتے رہتے تھے، اور اسلامی مسائل کے جدید مفسرین کے برخلاف ان کا قلم بڑی حد تک محتاط واقع ہوا تھا، متفرق مضامین کے علاوہ مستقل تصانیف میں غالباً صرف ایک کتاب اسلام کا نظریہ سیاست اس کی قلمی یادگار ہے، مرحوم کی ذات سے بڑی توقعات وابستہ تھیں، لیکن افسوس موت نے ان کو پوری ہونے کا موقع نہیں دیا، اﷲ تعالیٰ اس خادم دین کو اپنی مغفرت سے نوازے۔
(شاہ معین الدین ندوی، فروری ۱۹۵۲ء)