شری مشرو والا
افسوس ہے کہ گزشتہ مہینہ گاندھی جی کے مشہور چیلے شری مشرو والا نے انتقال کیا، وہ ہریجن کے اڈیٹر اور گاندھی جی کے مشن کے سچے حامل و مبلغ تھے اور اس زمانہ میں جب کہ کانگریس اپنے اصولوں سے عملاً بالکل ہٹ گئی ہے اور کانگریسیوں کی اکثریت اقتدار کی ہوس، ذاتی اغراض اور فرقہ پرستی میں مبتلا ہے اور فرقہ پرستوں اور خود غرضوں کی قوت اتنی بڑھ گئی ہے کہ سچے کانگریسی بھی مشکل سے ان کے مقابلہ میں زبان کھولنے کی جرأت کرسکتے ہیں، مشرووالاجی اپنے اصولوں پر قائم تھے اور آخر دم تک نہایت دلیری کے ساتھ گانگریس کی غلط روی پر تنقید اور گاندھی جی کے اصولوں کی تبلیغ و اشاعت کا فرض انجام دیتے رہے انھوں نے ان کی تعلیمات پر متعدد کتابیں لکھی ہیں، اس خود غرضی اور فرقہ پرستی کے دور میں ایسے مخلص اور سچے کانگریسی کا اٹھ جانا ایک ناقابل تلافی نقصان ہے، ان کی موت سے متحدہ قومیت کا ایک بڑا ستون گرگیا، جس کی جگہ مدتوں نہ بھر سکے گی۔ (شاہ معین الدین ندوی، اکتوبر ۱۹۵۲ء)