مولوی سید مقبول احمد
افسوس ہے کہ گزشتہ مہینہ اردو زبان کے کہن سال مصنف مولوی سید مقبول احمد صاحب صوفی نے ۸۵ سال کی عمر میں انتقال کیا، اردو کے پرانے مصنفین میں اس وقت وہ سب سے زیادہ معمر تھے، جب تک ان کے قویٰ کام دیتے رہے لکھنے پڑھنے کا شغل جاری رہا، مگر ادھر کئی سال سے ضعف پیری کی وجہ سے چھوٹ گیا تھا، وہ معارف کے پرانے مضمون نگار تھے جس موضوع پر لکھتے تھے معلومات کا انبار لگا دیتے تھے متفرق مضامین کے علاوہ حیات جلیل، تاریخ الٰہ آباد عرب اور ان کا مستقبل وغیرہ کئی کتابیں ان کی یادگار ہیں، ان کی موت سے ایک پرانی علمی یادگار مٹ گئی، اﷲتعالیٰ مقبول احمد کو آخرت کی مقبولیت سے سرفراز فرمائے۔ (شاہ معین الدین ندوی، مارچ ۱۹۵۵ء)