مولانا حبیب الرحمن لدھیانوی
یہ سطریں زیر تحریر تھیں کہ مولانا حبیب الرحمن صاحب لدھیانوی کی وفات کی خبر ملی، مرحوم ملک و ملت کے پرانے خدمت گزار، مجلس احرار کے مشہور لیڈر اور جنگ آزادی کے ممتاز مجاہدین میں تھے اور اس راہ میں قید و بند کی مصیبتیں جھیلیں، کانگریس سے ان کا تعلق بہت قدیم تھا، جو ہر زمانہ میں برابر قائم رہا، ہندوستان کی تقسیم اور اپنے وطن لدھیانہ کی تباہی کے بعد دلی میں متوطن ہوگئے تھے، ان کی عمر کا بڑا حصہ قوم و ملک کی خدمت میں گزرا طبعاً بڑے خاکسار متواضع، فیاض اور مہمان نواز تھے، دارالمصنفین کے لوگوں سے بڑا اخلاص رکھتے تھے، جب مشرقی اضلاع کی جانب آنا ہوتا تھا تو دارالمصنفین ضرور آتے تھے، ان کی صحت عرصہ سے خراب تھی، ابھی تھوڑے ہی دن ہوئے آنتوں کا آپریشن ہوا تھا، اس سے تو صحت یاب ہوگئے تھے، مگر ۲؍ ستمبر کو قلب کا دورہ پڑا اور دفعتہ انتقال کرگئے، اﷲ تعالیٰ اس پرانے خادم قوم کو اپنی رحمت و مغفرت سے سرفراز فرمائے۔ (شاہ معین الدین ندوی، ستمبر ۱۹۵۶ء)