مولانا سید شاہ محمد قمرالدین پھلواروی
یہ خبر بھی افسوس کے ساتھ سنی جائے گی کہ مولانا سید شاہ محمد قمرالدین صاحب پھلواروی، امیر شریعت صوبہ بہار نے ۳۱؍ جنوری کو انتقال فرمایا، مرحوم مولانا سید شاہ بدرالدین صاحب مرحوم، امیر شریعت اول کے صاحبزادے اور علم و عمل میں اپنے اسلاف کرام کے خلف الصدق تھے، اپنے بڑے بھائی مولانا سید شاہ محی الدین صاحب مرحوم امیر شریعت ثانی کے انتقال کے بعد ان کے جانشین ہوئے اور امارت شرعیہ کی روایات اور اس کے مذہبی کاموں کو پوری طرح قائم و برقرار رکھا، ان کی وفات سے خاندان پھلواروی کی ایک اہم یادگار مٹ گئی، اﷲ تعالیٰ ان کو اپنی رحمت و مغفرت سے سرفراز فرمائے اور ان کے اخلاف کو ان کے نقش قدم پر چلنے کی توفیق بخشے۔ (شاہ معین الدین ندوی، مارچ ۱۹۵۷ء)