ڈاکٹر بھگوان داس
اسی مہینہ ہندوستان کی ایک اور نامور شخصیت ڈاکٹر بھگوان داس نے انتقال کیا، وہ اپنے دور کے مشہور صاحب علم و قلم اور درویش صفت صوفی مشرب فلسفی تھے، فلسفہ اور تصوف پر ان کی بڑی گہری نظر تھی، اس پر انگریزی میں ان کی کئی تصانیف ہیں، اسلام سے پوری طرح واقف اور اسلامی تصوف سے خاص ذوق رکھتے تھے، عقیدۃً موحد اور اپنی تہذیب و معاشرت میں پرانی تہذیب و شرافت و وضعداری کا نمونہ تھے، اپنے مسلمان دوستوں کو جب خطوط لکھتے تھے تو اپنا نام عبدالقادر لکھتے تھے اور کہتے تھے کہ بھگوان داس اور عبدالقادر کے معنی ایک ہیں، بمبئی کے گورنر سری پرکاش صاحب کے والد تھے، ان کو شرافت و وضعداری اپنے والد ہی سے ترکہ میں ملی ہے،ڈاکٹر بھگوان داس کی موت سے ہندوستان کی ایک بڑی علمی و تہذیبی یادگار مٹ گئی۔ (شاہ معین الدین ندوی، اکتوبر ۱۹۵۸ء)