1676046599977_54338036
Open/Free Access
246
مولانا اختراحسن اصلاحی
افسوس ہے کہ گزشتہ مہینہ مولانا اختر احسن صاحب اصلاحی مہتمم مدرسۃ الاصلاح سرائمیر نے انتقال کیا، وہ مولانا حمیدالدین فراہیؒ کے ارشد تلامذہ میں تھے، ان کو انھوں نے اپنی مخصوص طرز پر کلام مجید پر غور و فکر اور اس کی تفسیر و تاویل کی تعلیم دی تھی اور وہ اس کے اچھے شارح و ترجمان تھے، اور سیاست میں بھی پوری دستگاہ حاصل تھی، دینداری اور زہد میں بھی استاد بزرگ کے شاگرد رشید تھے، انھوں نے پوری زندگی نہایت سادگی اور قناعت کے ساتھ ایک قلیل معاوضہ پر مدرسۃ الاصلاح کی خدمت میں گذار دی، اس زمانہ میں غربت و عسرت کے ساتھ علم و دین کی خدمت صرف عربی مدارس کا حصہ ہے وہ طبعاً نیک نفس، خاموش، عزت پسند اور نام و نمود سے بے نیاز تھے، ورنہ ان کے بعض رفقاء کی طرح ان کا شمار بھی مشاہیر میں ہوتا، مدرسۃ الاصلاح کی روح رواں اب وہی تھے، وفات کے وقت پچپن سال کے قریب عمر رہی ہوگی، اﷲ تعالیٰ علم و دین کے اس خادم کو اپنی رحمت و مغفرت سے سرفراز فرمائے۔ (شاہ معین الدین ندوی، نومبر ۱۹۵۸ء)
ID | Chapters/Headings | Author(s) | Pages | Info |
ID | Chapters/Headings | Author(s) | Pages | Info |