حاجی رشیدالدین
گذشتہ مہینہ اعظم گڑھ کی ایک پرانی یادگار حاجی رشید الدین صاحب نے بھی وفات پائی، مرحوم ترجمان القرآن مولانا حمیدالدین فراہیؒ کے سگے اور مولانا شبلی مرحوم کے ماموں زاد بھائی تھے، دارالمصنفین سے ان کا تعلق بہت قدیم اور مخلصانہ تھا، اس کی مجلس انتظامیہ کے رکن بھی تھے، مولانا حمید الدین صاحب مرحوم کے بعد مدرستہ الاصلاح سرائے میر کو ان ہی نے سنبھالا تھا، اور عرصہ تک اس کے ناظم رہے، ادھر چند سال سے ضعف پیری کی وجہ سے اس خدمت سے سبکدوش ہوگئے تھے، طبعاً بڑے نیک سیرت، پاک دل اور مرنجاں مرنج تھے، مولانا شبلی کے اعزہ میں سب سے زیادہ سن رسیدہ اب وہی رہ گئے تھے، نوے سال کے قریب عمر تھی، ادھر کئی سال سے بالکل معذور ہوگئے تھے، ہوش و حواس نے بھی جواب دیدیا تھا، صرف رشتۂ حیات باقی تھا، افسوس کہ وہ بھی منقطع ہوگیا، اﷲ تعالیٰ مرحوم کو اپنی رحمتِ کاملہ سے نوازے۔
(شاہ معین الدین ندوی، نومبر ۱۹۵۹ء)