خان بہادر ظفر حسین خاں
دوسرا حادثہ بہادر ظفر حسین خاں کی وفات کا ہے، وہ بھی اس علمی بزم کی یادگار تھے، اس لیے ان کے تعلقات بھی دارالمصنفین سے دیرینہ تھے، وہ انسپکٹر آف اسکولس کے عہدہ پر ممتاز تھے، اس سے ریٹائر ہونے کے بعد کچھ دنوں تک شیعہ کالج کے پرنسپل رہے، ادھر عرصہ سے عزلت نشینی کی زندگی بسر کررہے تھے، مگر تالیف و تصنیف کا سلسلہ آخر تک جاری رہا، ان کا خاص موضوع فلسفہ تھا اور اس کی تاریخ پر ان کی نظر بہت وسیع تھی، اس موضوع پر ان کی کئی تصانیف ہیں، ان کی ایک تصنیف مقالہ روسو عرصہ ہوا اور دوسری مال و مشیت ابھی چند سال ہوئے دارالمصنفین سے شائع ہوئی تھی، آخرالذکر کتاب پر ان کو ساہتیہ اکیڈمی سے پانچ ہزار انعام ملا تھا، انجمن ترقی اردو ہند سے بھی ان کی بعض فلسفیانہ تصانیف شائع ہوئیں، اﷲ تعالیٰ دونوں خدام علم کو مغفرت فرمائے۔
(شاہ معین الدین ندوی، اگست ۱۹۶۱ء)