ڈاکٹر حفیظ سید مرحوم
افسوس ہے کہ ہماری علمی بزم کی ایک پرانی یادگار ڈاکٹر حفیظ سید مرحوم نے گزشتہ مہینہ انتقال کیا ان کی پوری زندگی تعلیمی اور علمی مشاغل میں گزری اور آخر میں الٰہ آباد یونیورسٹی کی اردو کی پروفیسری سے ریٹائرڈ ہوئے تھے، وہ مشہور صاحب قلم تھے اردو، انگریزی دونوں زبانوں میں سیکڑوں مضامین، ان کی یادگار ہیں مستقل کتابوں میں مشہور دکنی شاعر قاضی محمود بحری کا کلیات تصحیح و ترتیب کے جملہ لوازم کے ساتھ مرتب کرکے شائع کیا تھا، ان کو تصوف اور روحانیات سے خاص دلچسپی تھی، اس ذوق میں انھوں نے مختلف مذاہب کے روحانی مرکزوں اور ان کی روحانی شخصیتوں سے بھی استفادہ کیا تھا مگر آخر میں اپنے اصلی مرکز کی طرف لوٹ آئے تھے اور اسی پر ان کا خاتمہ ہوا، مرحوم علامہ شبلی کے صحبت یافتہ اور ارکان دارالمصنفین کے پرانے رفقاء میں تھے، اس لیے دارالمصنفین سے ان کو دیرینہ مخلصانہ تعلق تھا، اس کی مجلس عاملہ اور مجلس انتظامیہ کے رکن بھی تھے، ادھر کئی سال سے فالج میں مبتلا تھے، گذشتہ مہینہ آنکھ کھلوانے کے لیے سیتاپور گئے تھے، وہیں دفعتہ انتقال کیا اور الٰہ آباد میں تجہیزوتکفین ہوئی۔ اللھم اغفرْلہٗ وَ ارْحمَہٗ۔ (شاہ معین الدین ندوی، جنوری ۱۹۶۲ء)