مسٹر کینیڈی
امریکہ کے پریسڈنٹ مسٹر کنیڈی کا قتل بہت بڑا بین الاقوامی حادثہ ہے، جس کا اثر پوری دنیا کی سیاست پر پڑیگا، وہ غیر معمولی صلاحیتوں کے مالک تھے، ابھی ان کی عمر ۴۶ سال کی تھی، اور ان کی مدت صدارت بھی ڈھائی سال سے زیادہ نہ تھی، اس عمر اور اس مدت میں بین الاقوامی معاملات میں انہوں نے جس تدبر اور ہوشمندی کا ثبوت دیا وہ ان کی سیاسی بصیرت اور عالی دماغی کی بین شہادت ہے، وہ مختلف رنگ و نسل کی قوموں کے درمیان مساوات، دوستانہ تعلقات اور امن کے بڑے علم بردار تھے، اور اس راہ میں ان کے بڑے کارنامے ہیں، وہ نسلی تفریق و امتیاز کے سخت خلاف تھے اور اس میں انہوں نے اپنی قوم کی بھی مخالفت کی پرواہ نہیں کی اور نیگرو اور یورپین نژاد امریکنوں کے درمیان حقوق کے مساوات کی کوشش کے جرم میں قتل کیے گئے، اس لیے ان کا قتل درحقیقت انسانیت کی راہ کی قربانی ہے، مذہبی حیثیت سے بھی وہ قابل قدر تھے، وہ راسخ العقیدہ کیتھلک تھے، پروٹسٹنٹ میں تو برائے نام مذہب رہ گیا ہے، گورومن کیتھلک کی بعض رسمیں مشرکانہ ہیں لیکن یورپ و امریکہ کی خدا بیزار اور مادہ پرست سرزمین میں مذہب انہی کے دم سے زندہ ہے۔ (شاہ معین الدین ندوی، دسمبر ۱۹۶۳ء)