سید ظہیرالدین علوی
سید ظہیر الدین علوی مرحوم رجسٹرار جامعہ اردو علی گڑھ کی وفات دنیائے اردو کا افسوس ناک سانحہ ہے، جامعہ اردو ان کا ایک بڑا کارنامہ ہے، اس کے ذریعہ اردو کی تعلیم کی جس قدر اشاعت ہوئی، اس کی مثال کوئی ادارہ پیش نہیں کرسکتا، جامعہ اردو کے امتحان دینے والوں کی تعداد ہزاروں سے متجاوز ہوگئی ہے، اس کی سند کو ہندوستان کی متعدد یونیورسٹیوں نے تسلیم کرلیا ہے، اس کا فائدہ یہ ہوا کہ سیکڑوں آدمیوں نے جامعہ اردو کے امتحانات کے ذریعہ محض انگریزی زبان و ادب کا امتحان دے کر انگریزی کی پوری تعلیم حاصل کرلی، اس سے لڑکیوں کی تعلیم میں خصوصیت کے ساتھ بڑی سہولت پیدا ہوگئی ہے، اﷲ تعالیٰ مرحوم کی مغفرت فرمائے، ان کے بعد جامعہ کی رجسٹراری کے لیے مولوی نورالرحمن صاحب کا انتخاب عمل میں آیا ہے، جو اپنی قابلیت اور تجربہ کے لحاظ سے اس جگہ کے لیے موزوں ترین شخص ہیں اور ہم کو یقین ہے کہ وہ اپنے پیشرو کے صحیح جانشین اور ان کا نعم البدل ثابت ہوں گے۔ (شاہ معین الدین ندوی، فروری ۱۹۶۴ء)