پروفیسر حامد حسن قادری
افسوس ہے کہ ادھر چند مہینوں کے اندر دنیائے علم و ادب کی کئی نامور ہستیوں، پروفیسر حامد حسن صاحب قادری، سید ہاشمی صاحب فرید آبادی اور مولانا صلاح الدین احمد نے انتقال کیا، پروفیسر حامد حسن صاحب قادری ہماری پرانی علمی بزم کی یادگار تھے، اردو اور فارسی زبان و ادب اور اس کی تاریخ پر ان کی نظر بڑی گہری اور وسیع تھی، تاریخ داستان اردو ان کی وسعت نظر کی شاہد ہے، وہ عرصہ تک سینٹ جانس کالج آگرہ میں اردو اور فارسی کے استاد رہے، ریٹائر ہونے کے بعد کراچی چلے گئے تھے، اور وہیں وفات پائی، ان کی وفات سے ایک پرانی علمی و تہذیبی یادگار مٹ گئی۔
(شاہ معین الدین ندوی، اگست ۱۹۶۴ء)