مولانا صبغتہ اﷲ شہید فرنگی محلی
افسوس ہے کہ گذشتہ مہینے ۲۴؍ دسمبر کو مولانا صبغتہ اﷲ صاحب شہید فرنگی محلی نے اتتقال فرمایا مرحوم ایک نامور عالم، لایق مدرس، خوش بیان خطیب، شگفتہ نگار ادیب اور خوش فکر شاعر تھے، ان کی سیرت کی تقریریں خصوصیت کے ساتھ بڑی موثر اور دل آویز ہوتی تھیں، عرصہ تک مدرسہ نظامیہ میں درس و تعلیم کی خدمت انجام دی، ایک زمانہ میں النظامیہ کے نام سے ایک رسالہ بھی نکالا تھا، انجمن خدام کعبہ کے عہدہ دار اور اس کے اخبار خادم الحرمین کے اڈیٹر رہے، خلافت اور ترک موالات کی تحریکوں میں بھی سرگرمی سے حصہ لیا تھا پھر لیگ میں شامل ہوگئے تھے، آداب و اخلاق میں قدیم تہذیب و شائستگی کا نمونہ، بڑے وضعدار خوش مذاق، بذلہ سنج اور علم مجلسی کے ماہر تھے صنع جگت سے بھی ذوق رکھتے تھے، غرض ان کی ذات میں بڑی جامعیت تھی، ان کی وفات سے بہت سی خصوصیات کا خاتمہ ہوگیا، اﷲ تعالیٰ ان کی مغفرت فرمائے۔ (شاہ معین الدین ندوی،جنوری ۱۹۶۵ء)