مسٹر چرچل
بالآخر مسٹر چرچل کو بھی پیام اجل آگیا، وہ ا س صدی کی عظیم ترین شخصیتوں میں تھے، ان میں اتنے کمالات جمع تھے کہ مشکل ہی سے ایک انسان میں جمع ہوتے ہیں، وہ صحیح معنوں میں صاحب السیف و القلم بلکہ کچھ اس سے بھی زیادہ تھے، ایوان سیاست میں بے نظیر و مدبر، عرصۂ رزم میں جنگ آزما سپہ سالار میدان علم و ادب میں سحر طراز ادیب و خطیب، وہ اپنی قوم کے بہت بڑے محسن تھے، انھوں نے جتنی طویل مدت تک اپنے ملک و قوم کی خدمت کی اس کا موقع کم لیڈروں کو ملتا ہے، انھوں نے نوے سال کی عمر پائی اور ستر سال تک مسلسل کسی نہ کسی حیثیت سے خدمت کرتے رہے، وہ برطانوی قوم کے ناخدا تھے، انھوں نے ایسے نازک موقعوں پر اس کو ڈوبنے سے بچایا جب اس کی امید بہت کم رہ گئی تھی، گو وہ قدامت پرست طبقہ سے تعلق رکھتے تھے جس کا نقطہ نظر برطانوی شہنشاہیت کی توسیع و استحکام اور دنیا میں اس کی بالادستی تھا لیکن وہ اتنے بڑے آدمی تھے اور انھوں نے اپنی قوم کی اتنی گوناگوں خدمات انجام دیں کہ ان کی ذات دنیا کے لیڈروں کے لئے نمونہ ہے جس سے ان کو سبق حاصل کرنا چاہیے۔
(شاہ معین الدین ندوی،فروری ۱۹۶۵ء)