حمید صدیقی
افسوس ہے کہ گذشتہ مہینے زائر حرم حمید صدیقی نے وفات پائی، وہ اس دور کے بہترین نعت گو تھے ان کی نعتیں محض شاعرانہ صناعی نہیں بلکہ سچے جذبات اور دلی کیفیات کی ترجمان ہیں، وہ جیسی پاکیزہ نعتیں کہتے ویسے ہی ترنم سے پڑھتے بھی تھے، ان کی نعتیں صاحب نعتؐ کی بارگاہ میں اتنی مقبول تھیں کہ ان کو دس بارہ مرتبہ آستان نبوی کی حاضری سعادت حاصل ہوئی طبعاً بھی بڑے مہذب اور شریف تھے، ادھر عرصہ سے ان کی صحت خراب رہتی ایک دن معلوم ہوا کہ ریاض نبوی کا زمزمہ سنج باغ رضوان میں پہنچ گیا، اﷲ تعالیٰ مدحِ نبویؐ کے طفیل میں ان کی مغفرت فرمائے۔
(شاہ معین الدین ندوی، مارچ ۱۹۶۵ء)