مولانا بدر الدین علوی
افسوس ہے کہ گذشتہ مہینے مولانا بدرالدین صاحب علوی سابق استاد عربی مسلم یونیورسٹی نے وفات پائی مرحوم استاد العلماء مولانا لطف اﷲ صاحب علی گڑھی کے تلمیذ رشید اور مولانا حبیب الرحمن خاں شروانی مرحوم کے ہمدرس تھے، ان کی پوری زندگی درس و تدریس اور علم و ادب کی خدمت میں گذری مسلم یونیورسٹی سے ریٹائر ہونے کے بعد گھر پر عربی کے شایقین کو درس دیتے تھے، انھوں نے عرصہ ہوا المختار بن شعر بشار بن برد پر اور اس کی شرح لابی الطاہر اسمٰعیل بن احمد التجیبی بڑے اہتمام سے تصحیح و تحشیہ کے ساتھ شائع کیا اﷲ تعالیٰ اس شیدائے علم کی مغفرت فرمائے۔
(شاہ معین الدین ندوی،مارچ ۱۹۶۵ء)