منشی احترام علی کاکوروی 
افسوس ہے کہ منشی احترام علی صاحب کاکوروی نے ایک طویل علالت کے بعد انتقال کیا، وہ ایک نامور باپ منشی احتشام علی صاحب مرحوم رئیس کاکوروی کے فرزند اور خود بھی بڑی خوبیوں کے انسان تھے، دارالعلوم ندوۃ العلماء سے ان کو موروثی تعلق تھا، وہ اس کے معتمد مال تھے، ایک زمانہ میں لکھنؤ کے مقامی قومی کاموں میں بھی حصہ لیتے تھے، لیکن ادھر کچھ دونوں سے خانہ نشینی کی زندگی اختیار کرلی تھی لکھنؤ کا مسلم یونیورسٹی کنونشن ان ہی کی کوشش کا نتیجہ تھا، وہ پشتینی رئیس تھے، لیکن طبعاً نہایت متواضع، خلیق اور شرفائے اودھ کی تہذیب و شرافت کا نمونہ تھے۔ اﷲ تعالیٰ ان کی مغفرت فرمائے۔
(شاہ معین الدین ندوی، فروری ۱۹۶۶ء)