نواب ناظر یارجنگ
نواب ناظر یارجنگ مرحوم ہماری پرانی بزم کی یادگار تھے، اس کی ساری خوبیاں ان میں جمع تھیں، وہ ایک بڑے باپ مولوی نظام الدین حسن مرحوم کے فرزند، خود حیدرآباد ہائیکورٹ کے جج اور اپنے اوصاف کے اعتبار سے بڑے آدمی تھے، وہ علی گڑھ کالج کے ابتدائی دور کے اولڈ بوائے تھے، اب شائد ہی ان کا کوئی معاصر زندہ ہو اور آخر تک ان کو اس سے وابستگی رہی، مدتوں مسلم یونیورسٹی کورٹ اور ایگزیکیٹو کونسل کے ممبر اور اس کے کاموں میں عملی حصہ لیتے رہے، ججی کے عہدے سے عرصہ ہوا ریٹائر ہوچکے تھے اور اپنا وقت حیدرآباد کے قومی و ملی کاموں میں صرف کرتے تھے، دارالمصنفین کی مجلس انتظامیہ کے پرانے رکن اور اس کے ہمدرد و ہوا خواہ تھے، ان سب سے بڑھ کر وہ عملاً مرد مومن تھے، ان کی موت سے ایک پرانی یادگار مٹ گئی، اﷲ تعالیٰ ان کی مغفرت فرمائے۔ (شاہ معین الدین ندوی،ستمبر ۱۹۶۶ء)