سید قطب
اخوان المسلمین کے مشہور رہنما سید قطب اور ان کے تین ساتھیوں کو ناصر کے خلاف سازش کے جرم میں پھانسی دے دی گئی اور دوسرے لیڈروں کو مختلف المیعاد قید کی سزائیں دی گئیں ہیں جن میں بعض عورتیں بھی ہیں، یہ کوئی خلاف توقع خبر نہیں، ناصر مختلف حیلوں سے اخوان کو ختم کردینے پر تل گئے ہیں، حجاز میں ان پر ناصر کے وحشیانہ مظالم کے جو واقعات معلوم ہوئے تھے، ان کو سن کر الجزائر کے مسلمانوں پر فرانس کے مظالم کی یاد تازہ ہوگئی تھی، یہ وہ دینی شخصیتیں تھیں، جن کے بارے میں کسی سازش کا تصور بھی نہیں کیا جاسکتا لیکن اعلا کلمۃ اﷲ کی تاریخ نیا واقعہ نہیں ہے، بہت سے اصحاب دعوت و عزیمت کو اس راہ سے گزرنا پڑا ہے، گویہ واقعہ ساری دنیائے اسلام کے لیے المناک ہے، لیکن سید قطب اور ان کے رفقا، شہید فی سبیل اﷲ کے درجہ عالی پر سرفراز ہوئے اور دعوت و عزیمت کی تاریخ میں ان کا نام ہمیشہ کے لیے روشن ہوگیا، اﷲ تعالیٰ ان شہدائے حق پر اپنی رحمت کے پھول برسائے۔ (شاہ معین الدین ندوی، ستمبر ۱۹۶۶ء)