مولوی مجید حسن
افسوس ہے کہ گزشتہ مہینے مدینہ اخبار کے بانی مولوی مجید حسن صاحب مرحوم نے وفات پائی، وہ اردو صحافت کے سب سے پرانے رکن تھے، موجودہ اردو اخبارات میں مدینہ سے پرانا اخبار کوئی نہیں، اب تو بہت سے روزنامے نکلتے ہیں، اس لیے سہ روزہ اخبار کی کوئی قدر نہیں رہ گئی، ایک زمانہ میں مدینہ دیہات دیہات میں پھیل ہوا تھا اور بہت سے ہونہار اہل قلم نے اس کی بدولت شہرت حاصل کی، مدینہ شروع سے قوم پرور رہا اور اس نے ملک و ملت دونوں کی یکساں خدمت انجام دی، مدینہ سے متعدد اہم مذہبی کتابیں شائع ہوئیں، اﷲ تعالیٰ اس کے بانی کی مغفرت فرمائے۔
(شاہ معین الدین ندوی، دسمبر ۱۹۶۶ء)